الجمعة، 12 أبريل 2013

ليه تعكنن علينا وع ال جابونا !!!!!


ليه تعكنن علينا وع ال جابونا لما ممكن تعكنن علينا وع ال جابونا وعلي العالم كله ؟

انا عارف انك تموت في العكننه ، وبتعز النكد قد عنيك ، وملكش في الهزار والضحك وده بيبان من وشك الكئيب ، طب ليه متستخدمش هوايتك في العكننه وتعكنن ع العالم كله؟

عندي خطه ليك تخليك تقرف العالم كله ونستريح احنا بأه منك شويه ، بص يا سيدي ، ايه رأيك انك تعمل فيها بطل وترجع حدود مصر لما قبل سنه 1952 ، وده مش هياخد منك كتير ولا مجهود ، ازاي؟ اقولك يا بطل :

اولا ، الواد كيمو بتاع كوريا هيلعب بالنووي قريب اوي ، وامريكا واوروبا هيبقو مشغولين جدا مع كيمو ، ودي فرصتك بأه تعمل فيها ابو الابطال وترجع السودان تحت الحكم المصري من تاني

السودان طول عمرهم جزء من مصر من ايام الدوله الفرعونيه ، وكان فيه اسره من الاسرات الل حكمو مصر ايام الفراعنه من السودان بس للاسف مش فاكر الرقم بتاعها ، والملك فاروق كان لقبه "ملك مصر والسودان" يبقي بدل منديهم "حلايب وشلاتين" ناخدوهم هم نفسهم ونرجعهم لينا تاني

وتأكد ان البشير مش هيعترض لانه مطلوب دوليا ، يعني مجرم حرب ، ولما يلاقي حد يتبناه ، ويبقي تحت حمايته مش هيتردد لحظه في انه يوافق لانه اساسا وافق علي تقسيم بلده فبالنسبه له الارض متهموش قد ما يهمه انه يفضل في الكرسي ، فممكن تشغله محافظ للسودان .

السودان الجنوبي فامره سهل ، كل الل هتعمله تبعت فرقه من الجيش علي طيارتين ، علي دبابتين وكله يخلص في دقايق ، وبكده احنا الاتنين نستفيد من بعض ، هم يلاقو الل يعلمهم ويطورهم واحنا نأمن منابع النيل من السودان ، ونبني سد كبير في جنوب السودان يبقي منافس لسد اثيوبيا.

اما بأه غزه ، اصلا كانت تحت الحكم والوصايه المصريه لغايه هزيمه 67 ، يبقي ايه المانع اننا نرجعها جزء من الاراضي المصريه تاني؟

الواد ابو مشعل هيتعبك شويه لانه شايف نفسه حبتين وعارف انه حليوه ومقطقط ، بس ممكن برضه يوافق انه يبقي محافظ علي غزه ، والاجنحه المسلحه لحماس نرميهم في الانفاق ونعملها سجون لغايه لما ينبذو العنف ، فاكر قانون نبذ العنف بتاع مبارك؟ طبعا مش ممكن تنساه ابدا ده انت كنت واحد من ال "نبذو" العنف مش كده برضه ؟

وبكده تقدر كل يوم ساعه العصاري تقعد علي الحدود مع "حبيبي بيريز" وتشرب معاه الشاي مع حته كيكه وكله يبقي تمام ، ساعتها بأه محدش فينا هيقدر يفتح بوقه ويقولك بتودي السولار لغزه ليه لانها هتبقي محافظه مصريه.

امريكا مش هتقدر تعملك حاجه لانها اساسا مشغوله بانهيارها الاقتصادي والسياسي وجيشها غرقان في افغانستان والعراق ، ومعندهمش استعداد للدخول في اي حرب تاني .

اما اسرائيل هترحب جدا ، لان ده كان مطلب اسرائيلي من مناحم بيجين قبل توقيع كامب ديفيد ، وعلي يدي ، مناحم كان قاعد هنا وانور السادات كان قاعد هناك ، ومناحم يقوله "خود غزه يا انور" وانور يقوله "مخدوش يا بابا مخدوش يا بابا" لانه كان عارف ان ياسرعرفات لا يأمن له جانب وانه عايز يبقي رئيس مش مجرد محافظ لمقاطعه مصريه 

وساعتها بأه الفلسطينين يدخلو ويطلعو من غزه لمصر زي ماهم عايزين لانهم هيبقو مصريين وفلسطينين في نفس الوقت ، ومش هيهاجرو من ارضهم لانهم هيفضلو في غزه ويعمروها ويطوروها.

ايه رأيك في الخطه دي ، واهو تنشغل شويه انت والجيش بدل منتو قاعدين فاضين كده مبتعملوش حاجه بالمرتبات الل بتاخدوها ، وتنزلو شويه من علي ودانا وترحمونا وترحمو العالم العربي كله من هطلكم ..

ليست هناك تعليقات:

إرسال تعليق