ربنا ينصرك يا ريس !!!!!

ربنا ينصرك يا ريس ..جملة تخرج على المشاهد فى الشريط اسفل الشاشة مثل عفريت العلبة مرفقة باسم الداعى او الداعية و ذلك بالطبع على القنوات المُسخرة بضم الميم نفسها لخدمة النظام و الجماعة و هى بالطبع مسخرة بفتح الميم برضه بمذيعيها ببرامجها بسلطاتها ببابغنوجها
ربنا ينصرك ياريس على شعبك اللى مش مقدر مواهبك الفذة و لا قد ايه بتتعب علشان شعبك اللى كارهك بس انت بتحبه و بتحضنه و بتبوسه !!! ربنا ينصرك على المعارضة اللى مش عاجبها العجب مع انك واخد بالك من كل صغيرة وكبيرة كفاية انك كنت امبارح بتتابع احداث الكاتدرائية لحظة بلحظة .. ام البنات هفلطت بالكلام و قالت بلا وكسة تلاقيه بيتفرج فى المقطم عند حبيبه قلت لها ازاى بس كده الحاجات دى الريس بيحب يتفرج عليها و يتابعها بمزاج فى اوضة لوحده و هو مرحرح .. هو انت كنت بتابعها على شاشة كام بوصة ياريس؟!! صح هى النتيجة انتهت كام كام ياريس اصل فاتنى شوية ما انت عارف الكهرباء بتقطع كل يوم و كدهوت .. سمعت انهم 91 صفر ياريس منهم اتنين اتقتلوا ياللا فى داهية المهم اننا نفضل نسيج واحد !!! بس النتيجة دى ياريس خلتنى اتلخبط شوية طب ازاى ياريس و الكنيسة مليانة سلاح آلى و قنابل و عندنا ادلة و براهين على كده و على سبيل المثل و ليس الحصر تصريحات الداعية الشاذ !!! وجدى غنيم و المرشح السابق للرئاسة الدكتور سليم العوة و هو اهل ثقة و رؤية ثاقبة و قيمة دستورية ساهمت فى دستور مصر الذى اهدته اللجنة الدستورية للاجيال و بدليل استعانة السودان به فى وضع دستورها و شوف السودان وصلت لايه النهاردة ياريس ... يظهر على كده ان الاقباط دولم غشم ياريس ما بيعرفوش يستخدموا السلاح بنفس حرفية العيال القرود بتوع ميلشيات الاخوان ربنا يخليهم لك ياريس و يخليهم للجماعة .. معلش ياريس بتقل عليك هو انت لحقت تشوف الطرف التالت اصل انا ما كنتش مركز اوى و الشاشة عندى صغيرة .. طب و لا حتى شوفت الصباع اللى بيلعب ؟!! انا برضه قلت للزالفة ام البنات انك ما شفتش لانك لو شوفته لمؤاخذة و هو بيلعب كنت قطعته انت قلت كده !!! بس شوفت ياريس لما وزير داخليتك السبع جه للكاتدرائية بناء على تعليمات سعادتك .. راجل ينضرمبم بيه المثل ..كل هسس .. البلطجية اللى بتضرب ع الكاتدرائية هسسسسسسسسس و الامن المركزى هسسسس ..باشارة منه قبل ما يدخل دخلته البلطجية سكتوا و الامن المركزى كمان و اول ما مشى كما كنت كله رجع و الضرب اشتغل ..راجل ليه شمخة ايوه اول ما تشوفه بيهل عليك تقول ابو شمخة اهو !!! خير ما اخترت ياريس ربنا ينصرك .. عجبتنى برضك ياريس فى اتصالك و تثبيت للبابا تاوضروس ان اى اعتداء على الكنيسة اعتداء على شخصك .. طبعا ساعتها سفخت ام البنات على بقها لما زلفت و قالت كسبنا صلاة النبى و هلفطت بكلام لمؤاخذة مالهوش لازمة و انك لمؤاخذة يعنى متعود ياريس تنضرب لما ما يبانلكش اصحاب قبل ما ترد اصل الضرب ع الكاتدرائية اللى انت اعتبرته اعتداء عليك شخصيا فضل شغال على ودنه من الصبح لبليل و انت يعنى لمؤاخذة و لا اندهاشة بتتابع بس قلت لها يا جاهلة الريس بيتابع علشان يعرف التيتية منين و بعدين هو مستنى القرار يجي له اقصد طبعا الالهام ما هو انت ياريس دلوقتى ريس ملهم من الله زى ما خطباء المساجد اللى بيتصلى فيها بيقولوا فى خطبهم يوم الجمعة .. ربنا ينصرك على المغرضين اللى ربطوا بين الاعتداء على المؤسسة القضائية و تشويه الجيش و الاعتداء ع الازهر الشريف الذى له رمزية خاصة و اخيرا ع الكاتدرائية التى هى ايضا رمزية خاصة بانها محاولة من النظام لهدم اركان الدولة و اخونتها مع ان الفاعل طرف تالت ما يهموهوش مصلحة مصر .. عموما انا بقول للمغرضين دولم ياريس رمزية دى تبقى خالتكوا يعنى ايه اخونة الدولة ما الدولة اصلا بقت اخوان و بعدين هم الاخوان مش مصريين من حقهم يمارسوا حياتهم الطبيعية فى بلدهم و لا ايه .. الريس ربنا ينصره رجل يحترم القانون و الشرعية بدليل انه اعتبر الاعتداء ع الكاتدرائية اعتداء على شخصه ..الريس موته و سمه الاعتداء ع الشرعية علشان كده رجالته بالداخلية ما قبضتش على اى مواطن كان واقف جنب مصفحة او ظابط او شايفينه على اسطح المنازل المجاورة طالما بيضرب طوب ع الكاتدرائية ليه لان الريس بيحترم الحريات لان الريس بيحترم القانون و البلطجى اللى واقف جنب الشرطة ممثل للقانون واحد يقولى ازاى يعنى ؟ ارد و اقول له يا سطحى القانون دلوقتى قانون بلطجة يبقى البلطجى ده ممثل للقانون و لا لأ هه ؟!! و لما الريس يصدر امر باعتقاله يبقى بيعتدى ع المواطن و الشرعية و لا لأ !!! ربنا ينصرك ياريس على اعدائك من ابناء الوطن و الشرفاء علشان تكمل اهدافك و المشروع الاسلامى و الخلافى و النهضة يارجل العلم و الدين و العدل !! يامحرر الافواه و محترم الحريات .. ردت ام البنات اللى لسانها زالف حريات ايه بلا نايبة ده رفع قضايا على برامج و صحفيين و اعلاميين ما عملهاش اللى قبله فى تلاتين سنة .. رديت و قلت لها يا جاهلة ما هو هنا التميز .. ريسنا ربنا ينصره متميز و بعدين هو رفع على مين يعنى هه ..رفع ع الاعلام المغرض الفاسد زى الاراجوز باسم يوسف و المتسيب جابر القرموطى و المسبسب وائل ايبراشى و قناة ال سى بى سى و الاون تى فى و كام جريدة بتهفلط زيك اما اعلام محترم على غرار القناة الاولى و اعلام قناة الحافظ و الناس والرحمة اعلام لابد ان تفتح له الطاقات لينطلق .. يعنى اعلامى شيخ زى ابو اسلام الشيخ اللى بيعلم الناس الدين بيعرف البسطاء بدين امه و دين ابوه لازم يسيبه ..لازم يسيبه يشرح الايمان الحقيقى خصوصا لغير المسلمين و خصوصا الاقباط اللى الاعتداء على كاتدرائيتهم اعتداء على شخص الريس!! .. علشان الناس تعرف حقيقة ايمانهم و يستفيدوا من هذا العلامة الفذ المتبحر فى القنوات الاباحية و الانترنت النادر .. الشاذ !!! فى علمه!!! رجل المراكب الورق الذى يبحر فى الخيال و العلمة رجل الجزمة الذى اثبت بالدليل القاطع ان الاقباط يعبدون العضو الذكرى !!! لمؤاخذة لا حياء فى العلم والراجل اقسم بايمانات امه انه تاكد من ذلك بنفسه !!!! لا بنفسه ازاى ما اعرفش بس هو اقسم يبقى نصدقه و لا لأ ؟!! ربنا ينصرك ياريس يا موحد القطرين ..ده بمناسبة زيارتك للسودان و استلهامك للنموذج السودانى لتطبيقه فى مصر .. بس بجد ياريس عجبتنى حتى فى البشارة اللى حملتها لهم بانهم يبشروا ان النهضة قادمة طبعا قادمة و عجبتنى اكتر انك ثبتهم بحلايب و شلاتين يعنى ما انضحكش عليك .. و احنا كنا بنعمل بيهم ايه يعنى اهو احسن من ركنتهم شوية كراكيب مبوظة حتى المنظر بتاع خريطة مصر .. ناصح ياريس ..ربنا ينصرك على من يعاديك ..
حسيبك ياريس علشان النور قطع و اكمل معاك فى طائر النهضة من راسه لمؤخرته .. ربنا ينصرك ياريس .