نفسي حد يعلمني
السلبية
يعلمني أزاي أشوف
الغلط بعينيه
وأعمل فيها زي
العبيط
وأقول لنفسي
هو أنا هأعدل الكون
بأيديا
هو أنا كل ماأروح
مكان أتخانق
ويقولوا مشاغب
وماشي في طوب الأرض
يخانق
وف النهاية الغلط
هو اللي بيمشي
وأنا تتعلقلي المشانق
نفسي في مرة أقول
وأنا مالي
وأمشي زي كل الناس
في حالي
ويحصل زي مايحصل
جنبي
أعمل فيها مش واخد
بالي
نفسي أتعلم مسح
الجوخ
وأخلي مديري علطول
منفوخ
وأربطله رباط الجزمة
تمام
وأخد بيها بنط
لأدام
واوصل بيها زي
الصاروخ
نفسي أبطل بقي
تفكير
وأنسي كلمة التغيير
وأبين أني سعيد
مبسوط
لما حمار يبقالي
مدير
وأقف أدامه أنتباه
وأقوله أخيراً
ياولداه
جابولنا الفكر
المستنير
وأبدأ أمسحله في
كرسييه
ورايح جاي ألمع
فيه
وأقول الله عليك
ياكبير
وقبل مايفتح بقه
بكلمة
أسقف وأملا الكون
صفافير
نفسي أبطل كلمة
لأ
عشان دي بلد كارهة
الحق
ولسه بترفض التحرير
ليست هناك تعليقات:
إرسال تعليق